Një 59-vjeçar ka vdekur sot në rrugën “Remzi Hoxha” në Ferizaj, pasi ka rënë nga kati i gjashtë i ndërtesës ku ishte duke punuar.
Për vdekjen e 59-vjeçarit tashmë është arrestuar dhe është ndaluar për 48 orë një person nën dyshimin për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”.
Këtë e ka konfirmuar për “Zërin” Vjosa Baftiu, zëdhënëse e Prokurorisë Themelore në Ferizaj.
“Me vendim të prokurorit të Shtetit, është ndaluar një person i dyshuar në kohëzgjatje prej 48-orësh për shkak të dyshimit të veprës penale ‘Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës’, nga Neni 358 i Kodit Penal të Republikës së Kosovës. Prokurori i Shtetit ka udhëzuar Policinë dhe Inspektoratin e punës për ndërmarrjen e veprimeve të nevojshme hetimore, me qëllim të zbardhjes së të gjitha rrethanave të rastit në fjalë”, ka thënë Baftiu.
